Sæl, öllsömul!
Við þjálfarar ætlum þá að fara örfáum orðum um æfingaleikinn við Hauka sem fram fór á sunnudag í Risanum í Hafnarfirði. Leikið var í átta manna liðum og var leiktími 2x25 mínútur.
Skemmst er frá að segja að um hörkuleik var að ræða og jafnræði með liðum. Álftanes átti þó frumkvæðið í leiknum hvað markaskorun varðar og komust fljótlega í örugga forystu sem ekki var látin af hendi þrátt fyrir að Haukar hefðu verið nálægt því að jafna í stöðunni 4-5. Mörk Álftaness urðu átta talsins en mörk Hauka sex. Lyktir urðu því 6-8, Álftanesi í vil. Mörk Álftaness gerðu: Guðmundur Ingi 3, Örvar 3, Magnús 1 og Salka 1, en hin síðasttalda var að leika sinn fyrsta leik með 4. flokki og stóð sig prýðilega.
Heilt yfir var spilamennskan sæmileg en nokkuð má gagnrýna að of lítið flæði var á knettinum og hnoð og miðjuþóf of mikið. Stafaði það einkum af því að útileikmenn voru sjö talsins og að mati okkar þjálfara var það á kostnað gæðanna en af þessum sökum fengu leikmenn ekkert pláss og engan tíma með knöttinn. Eftir á að hyggja hefði e. t. v. verið heppilegra að leika í sjö manna liðum - þá hefðu leikmenn beggja liða fengið aðeins meira olnbogarými og mögulega hefði samleikur orðið meiri. Þrátt fyrir að gagnrýna megi þetta þá var margt jákvætt, s. s. ákefð og hugarfar sem hvoru tveggja var til fyrirmyndar.
Birgir og Guðbjörn þjálfarar.
