Sæl, öllsömul.

Stutt endurgjöf um æfingaleikina við Fylki fyrr í dag. Nokkuð ólíkir leikir en mjög fínir, hvor á sinn hátt.

Í leik A-liða var hátt tempó þar sem við náðum tveggja marka forystu snemma leiks sem við héldum til enda. Frábærir spilakaflar í leiknum þar sem við sköpuðum urmul marktækifæra og áttum t.d. skot í stöng og markslá. Hefðum að mínu mati getað gert aðeins betur upp við markið. Í raun öruggur og góður sigur sem aldrei var í hættu og síst of stór. Mörkin gerðu Mist og Vaka.

Leikur B-liða var allt öðruvísi, en í raun var um jafnan leik að ræða, einkum framan af. Gerðum tvö mörk í fyrri hálfleik en í síðari hálfleik opnuðust allar flóðgáttir og náðum við að setja fimm mörk. Lyktir urðu 7-2, okkur í vil. Mörkin gerðu Eva María 3, Heiða Lóa 2, Bjartey 1 og Embla 1. Stór sigur miðað við gang leiksins en við nýttum marktækifæri okkar afar vel og uppskárum eftir því. Markverðir okkar gerðu einnig oft og tíðum vel.

Heilt yfir er ég ánægður með frammistöðu beggja liða og verkefnið kærkomið. Fullt af góðum spilaköflum, marktækifærum, mörkum og allar stúlkur fengu að spila og vonandi verkefni við hæfi. 

Birgir Jónasson þjálfari.

Sæl, öllsömul.

Á morgun, þriðjudag, leikum við æfingaleiki við Fylki.

Leikirnir fara fram á Álftanesi frá kl. 17:30 til 19:30, eða því sem næst á æfingatíma. Fyrst leikur A-lið og B-lið beint í framhaldi.

Liðsskipan hefur ekki verið ákveðin og mun ekki skýrast endanlega fyrr en á morgun. Í megindráttum verður þó stuðst við þá liðsskipan sem verið hefur fram til þessa. Einhverjar stúlkur munu þurfa að leika hluta úr báðum leikjum.

Af þeim sökum munu stúlkur beggja liða þurfa að mæta kl. 17 í vallarhúsið, fullbúnar til leiks.

Birgir Jónasson þjálfari.

Sæl, öllsömul.

Nokkur orð um leik B-liðsins í dag.

Hörkuleikur og í járnum framan af. Lítið af opnum færum og mikill barningur, einkum inni á miðsvæðinu. FH stúlkur líkamlega sterkari og gerðu okkur erfitt fyrir, auk þess sem völlurinn var hrímaður og sleipur. Náðum ekki upp miklu spili og á köflum gekk knötturinn fram og til baka. Rétt fyrir leikhlé náðum við að skora fyrsta mark leiksins, en markið hefði ekki getað komið á betri tíma. Embla skoraði markið.

Í síðari hálfleik vorum við ívið sterkara liðið og náðum að bæta við tveimur góðum mörkum. Þar voru Heiða Lóa og Eva María á ferð. Leikurinn opnaðist aðeins þegar á leið og FH var í raun nær því að minnka muninn en við að bæta við. Sigur okkar var þó fyllilega sanngjarn, en nokkuð stór.

Heilt yfir ég ánægður með frammistöðuna. Náðum að setja þrjú góð mörk, tvö komu eftir „gamm“ og það þriðja eftir frábæran samleik. Skrýtið að segja frá því en í síðasta leik fannst mér við hafa meiri stöðulega yfirburði en sá leikur tapaðist. Í þessum leik var jafnræði en samt 3-0 sigur. Allar stúlkur fengu að spila og við náðum að víxla leikmönnum í stöðum og rúlla þessu vel áfram. Við fengum ekki mörg marktækifæri, mun færri en í síðasta leik, en nú nýttust þau færi sem fengust afar vel. Það sem tökum með okkur úr leiknum er baráttugleðin og viljinn. Mér fannst við vera undir líkamlega í leiknum en við unnum það upp með meiri gæðum en mótherjinn, betri liðsheild, betra skipulagi og áræðni. Frábær sigur hjá ykkur stúlkur!

Birgir Jónasson þjálfari.

Sæl, öllsömul. 

Leikið verður í B-liðum í Faxaflóa-/Reykjavíkurmóti á sunnudag. Mótherjar er FH en leikar fara fram á Álftanesi og hefjast kl. 11. Stúlkur þurfa að mæta kl. 10 í vallarhúsið. 

Sömu stúlkur og boðaðar voru í síðasta kappleik hjá B-liði eru nú boðaðar, auk Valdísar. 

Birgir Jónasson þjálfari.