Sælar, stúlkur!

Engin æfing verður um helgina og því er næsta æfing á mánudag, kl. 20. Vil þó biðja stúlkur um að gera eitthvað um helgina, t.d. fara út að skokka eða ganga.

Mun svo birta dagskrá næstu viku um helgina.  

Birgir Jónasson þjálfari.

Sælar, stúlkur!

Þá er heimasíðan komin aftur í gagnið og unnt að láta til sín taka á ritvellinum. Ætla að byrja á því að fjalla um leikinn við Grindavík í gærkvöldi sem fram fór í Grindavík við bestu aðstæður.

Um hörkuleik var að ræða sem byrjaði þó ekki vel því fyrsta mark leiksins kom eftir tæplega eina og hálfa mínútu og þar voru Grindavíkurstúlkur á ferð. Eftir það vorum við smá tíma að jafna okkur en smám saman náðum við að vinna okkur inn í leikinn og um miðjan hálfleik fannst mér við taka ákveðið frumkvæði í leiknum. Fengum við þá skyndisóknir sem voru stórhættulegar. Grindavík náði ekki að skapa sér nein afgerandi marktækifæri, ef undan er skilið eitt skipti þegar leikmaður Grindavíkur komst einn gegn Þórdísi sem gerði vel og hrifsaði knöttinn af fótum leikmannsins. Stóð því 1-1 í leikhléi.

Í síðari hálfleik var jafnræði með liðum en áfram fannst mér við hafa ákveðið frumkvæði, einkum þó sóknarlega, en stúlkurnar voru stórhættulegar fram á við. Um miðjan hálfleik fengum við tvær hornspyrnum með stuttu millibili og náðum við að skora gott mark eftir darraðardans í vítateignum eftir hina síðari. Þar var fyrirliði liðsins, Sigrún, á ferð. Frábært mark eftir fast leikatriði. Stuttu eftir það fengum við hálffæri sem ekki nýttist og við tók nokkur pressa að okkar marki. Þegar um tíu mínútur lifðu eftir af leiknum náðu Grindavíkurstúlkur að skora mark eftir nokkuð harða atlögu að okkar marki og reyndist það mark vera sigurmark leiksins. Voru Grindvíkingar fremur nær því að bæta við en okkar stúlkur að jafna. Urðu lyktir leiks því 2-1, Grindavík í vil. Verða það að teljast sanngjörn úrslit.

Heilt yfir er ég ánægður og stoltur af leik stúlknanna sem gáfu allt í leikinn og lögðu sig allar fram. Ekki er unnt að biðja um meira. Í leiknum voru margir mjög jákvæðir punktar. Í fyrsta lagi gekk það upp sem við lögðum upp með, að undanskilinni afleitri byrjun. Skipulag var gott og við náðum að loka á ákveðin svæði vallarins og draga svolítið vígtennurnar úr Grindavíkurstúlkum sem hafa staðið sig framúrskarandi í sumar og unnið alla leiki sína í deild og bikar. Í öðru lagi náðum við upp góðum spilaköflum inni á miðsvæðinu en þar vorum við með ákveðnar áherslubreytingar. Náðum við í nokkur skipti í leiknum að leysa vel úr pressu með einnar snertingar knattspyrnu og þá náðu leikmenn að halda knetti betur inni á miðsvæðinu en verið hefur. Í þriðja lagi voru við að ná að opna fyrir framhjáhlaup bakvarða í nokkur skipti í leiknum og í nokkur skipti gekk það upp. Þetta höfum við æft sérstaklega og, eins og stúlkur vita, snýst ekki aðeins um hlaup bakvarðar heldur ekki síður um fríhlaup manns án knattar. Í fjórða og síðasta lagi fannst mér vera ákveðið bit í okkar sóknarleik, eitthvað sem ég ekki hefur sést nægjanlega mikið af í undanförnum leikjum. Minnti þetta um margt á það sem best gerðist í Lengjubikarnum og í Faxaflóamóti, en var þó mun betra og skipulagðara. Að mínu mati getum við byggt á þessari frammistöðu og látið okkur það að kenningu verða að byrja leik svo afleitlega en, því miður, var þetta ekki fyrsta sinn sem það gerist. Má það ekki gerast aftur.

Minni svo á æfinguna í dag, fimmtudag, kl. 18.

Birgir Jónasson þjálfari.